مسرحية لجنة القرارات والتنفيذ
فكرة المسرحية
تدور أحداث المسرحية حول لمى، وهي طالبة في المرحلة الثانوية (البكالوريا)، اعتادت في بداية كل أسبوع أن تضع مخططًا لمهامها وأهدافها اليومية، ثمّ تكتبه على السبورة التي تتضمّن أيام الأسبوع. في بداية كل يوم، وقبل ظهور لمى على المسرح، تظهر شخصيات تجلس في أماكنها الخاصة، لتناقش المهام المقررة لذلك اليوم وكيفية التعامل معها وتنفيذها.
في المسرحية سيتمّ عرض خطّة أسبوع: من يوم الاثنين إلى يوم الجمعة. خلال أيام الأسبوع الخمسة، سنرى كيف تؤثر كل شخصية من هذه الشخصيات الداخلية في قرارات لمى وسلوكها. وسيحمل كل يوم رسالة محددة تتعلق بأحد مفاتيح الشخصية الناجحة. يومياً، يتم كتابة ما تم إنجازه من الخطّة على السبورة. وفي نهاية المسرحية، سيتم توضيح هذه المفاتيح، وبيان أهمية تحقيق التوازن بين تأثير الشخصيات.
تمثّل كل شخصية جانبًا داخليًا من الإنسان.
- حكيم: أمامه مجموعة من الكتب، يمثل العقل والمنطق.
- سليم: أمامه مجسمات لجسم الإنسان، بالإضافة إلى فيتامينات وأدوية، يمثل الصحة والجسد.
- حريص: أمامه حصّالة، وشيكات، وعملات، وكاشير، يمثل الإدارة المالية.
- نور: أمامه سجادة صلاة، ومسبحة، وصور للعائلة، يمثل العاطفة والوجدان والإيمان.
- أبو الرواق: توجد على طاولته فناجين قهوة وشاي، وبعض قطع الشوكولا، وهيدفون، يمثل المزاج.
توزيع الأفكار على الأيام
- الاثنين: النجاح يبدأ بالتخطيط الواضح والمنطقي.
- الثلاثاء: النجاح يحتاج إلى انضباط واستمرارية والتزام بالخطّة وعدم التوقف أو التأجيل عند أول تعب.
- الأربعاء: النجاح الحقيقي هو التوازن بين العقل والجسد والروح والمزاج، مع مراعاة الأولويات دون خلل.
- الخميس: النجاح يحتاج إلى وضوح الحافز، ومهارات في إدارة الضغوط.
- الجمعة: النجاح عبارة عن عملية تراكمية، نصحح الأخطاء، نضيف مهارات، وتعديل التقنيات، ونعيد المحاولة.
الأدوات
سبورة، كتب، مجسم جسم الإنسان، علب أدوية، كريمات، حصالة، كاشير صغير، سجادة صلاة، مسبحة، إطار صور عليها صورة عائلة، فناجين شاي، هيدفون، بطاقات عليها الأسماء.
المسرحية
مشهد خطّة الأسبوع
(تدخل لمى إلى المسرح وهي تحمل دفترا وأقلاما، وتتجه نحو السبورة، تقف أمامها للحظات وكأنّها تفكر، ثمّ تبدأ بالكتابة وتضع خطّة الأسبوع)
لمى: السلام عليكم، بسم الله أسبوع جديد.
- الاثنين: عنا دراسة الفصل الأول، رياضة 30 دقيقة، ورد القرآن
- الثلاثاء: رح أدرس الفصل الثاني، وحل أسئلة إضافية، وبعدها ورد القرآن
- الأربعاء: دراسة الفصل الثالث، شوية رياضة، وورد القرآن
- الخميس: رح أعمل مراجعة شاملة لكل شي، والنوم مبكرًا استعدادًا للامتحان، وورد القرآن
- الجمعة: يا رب تفتح عليّ، امتحان الرياضيات، وبعده رح أعمل استرااااحة طويلة. ادعولي!
لمى: ممتاز… إذا التزمت بالخطة يوم بيوم، رح يصير كل شي أسهل.
(تتفقد البرنامج مجددا، ثمّ تنظر إلى الجمهور)
لمى: رح يكون هالأسبوع مليء بالانتاج، والإنجاز، يا رب تخلص سنة البكالوريا على خير.
(وتخرج لمى من المسرح)
مشهد يوم الاثنين
(يدخل حكيم وهو متحمّس ومندفع)
حكيم: يلا بلّش الأسبوع، وين الشعب؟ فيقوا، عنا دراسة لفوق راسنا.
(يدخل سليم)
سليم (وهو يتمدد): صباح الخير.
حكيم: شلون كانت النومة، طمنّا؟
سليم: ممتاز، الوضع ممتاز.
حكيم: المفاصل، العضلات، شو الوضع؟
سليم: كله سليم.
(يدخل نور)
نور: السلام عليكم، الله يسعد أوقاتكم.
حكيم: تفضل شيخنا، يا أهلاً وسهلاً، نوّرت.
نور: الله يزيد فضلك، يا رب منقول بسم الله، وين الباقي؟ ليش هيك ما عم يحسبوا حساب التأخير؟
(يدخل حريص)
حريص: حساب؟ حدا قال حساب؟
حكيم: طول بالك حريص أفندي، ما في حساب، دخيلكم لا تجيبوا سيرة المصاري قدامه، دي اقعود برضاي عليك.
(ويجلس حريص، في تلك الأثناء يأتي صوت من بعيد)
أبو الرواق (وهو يغنّي): أنا عم أحلم، ليل نهار، بالورد المليان زرار…
(يدخل أبو الرواق ومعه فنجان قهوة، وهو بمزاج عالٍ)
أبو الرواق: يسعدلي صباح هالورود، سكاكر ومعقود.
حكيم (لأبو الرواق): اي خلصنا واقعود، بلا سكاكر بلا سنافر، بدنا نبلش نراجع الخطة، لأنه لازم تبلش لمى دراسة، يلا سليم، عطينا التقرير الطبي من عندك.
سليم: نامت لمى 8 ساعات وخمس دقايق و34 ثانية، صحتها تمام، أكلت وجبة إفطار ممتازة من ايديهن الماما، وعملت روتينها الصباحي للعناية بالبشرة، وهي هلأ جاهزة لتبدأ الدراسة على الـ 24 قيراط.
حكيم (لنور): وإنت شيخنا، عندك أي اعتراض أنه نبدأ؟
نور: صلت لمى صلاتها الصبح، وما عليها أي فرض، وصبّحت على أبوها وأمّها، وردّت على الرسائل المهمّة، لمى جاهزة أنه تبدأ الدراسة، بإذن الله.
حكيم: طيب معناها، نعطي الأوامر ببدء الدراسة.
حريص: وين وين وين وين؟ وأنا ما حدا سألني؟ ولا شايفيني مزهرية؟
حكيم: حبيبي، شفتنا وققنا على كاشير شي؟
حريص: لأ
حكيم: عم نقرر نشتري شي؟
حريص: لأ
حكيم: عم نفكّر نطلب شي؟
حريص: لأ
حكيم: معناها ريحلي حالك، حاليا مالك شغل، بس يجي دورك منسألك، دونت وري.
(يتحرك حكيم، ويهدأ الباقون، ويجلسون)
حكيم: وأخيرا بدأت بالدراسة، ممتاز، كله ضمن الخطة، ممتاز!
(يبدأ الأربعة بالتململ، والعبث بأغراضهم، والتأفف، وحكيم يحثّهم على الصمت)
سليم: صارلها قاعدة 3 ساعات، بكفي بدنا رياضة.
نور: صار وقت صلاة الظهر، خليها تصلي أول شي.
حكيم: ثواني لسه بقيان فقرتين، منخلص وبعدها منعمل باوزه.
أبو الرواق: بدنا بريك، بدنا بريك، بدنا قهوة مستعجلة!
نور: بس خلي أول شي تصلي…
حكيم (باستياء): خلص، خلص، خلص، ما بقا فيني أركّز، استراحة!
مشهد يوم الثلاثاء
(يدخل سليم وحكيم معا)
سليم: أنا وأنت لازم نكون دوماً بصف بعض، العقل السليم في الجسم السليم، لازم تسايرني وقت بقلك “حاج تعبنا”
حكيم: ما عندي مانع لما بتكون طلباتك منطقية، بس يا من تراك عم تتظاهر بالتعب كرمال نأجّل الخطة!
حكيم (يمسك حكيم بالقلم): يعني امبارح بالزور قدرنا نحقق المطلوب.
(ويضع حكيم صح بجانب مخطط يوم الأثنين)
سليم: أنا؟ أنا بتظاهر بالتعب؟
حكيم: لكا أنا! لسه شي مشغول بروتين البشرة، شي بدك ماسكات، شامبويات…
(يدخل حريص ثمّ نور)
نور: صباح النور.
حريص: صباح الخيرات والليرات.
(يدخل أبو الرواق وهو غاضب)
أبو الرواق: لا حدا يحكي معي أنا.
حكيم: خير خير خير، أبو الرواق، شو في؟
أبو الرواق: مالي رايق أبدا.
حكيم (ينظر للبقية ويقول لهم): رح يسودلنا يومنا، وهلأ بتشوفوا.
(يجلس الجميع)
حكيم: برنامجنا اليوم كالتالي: دراسة الفصل الثاني، وحل مسائل إضافية… مستعدين؟
سليم: الوضع عندي تمام.
أبو الرواق: أنه تمام؟ لمى عندها بوادر صداع من وقت ما فاقت اليوم، ورح يشد عليها راسها أكتر، سماع مني لا تتهور.
سليم (يراجع أوراقه): صح اي في شوية صداع، لكن ممكن نلحقه بمسكن ألم.
أبو الرواق: اي سفّوا كمان أدوية، سفّوا، حسبي الله عليكم بس.
حكيم: التالي… نور!
نور: مممم، الأمور تحت السيطرة.
حكيم: وليش هيك عم تقولها بتردد؟
أبو الرواق: شكله ماله مرتاح، في شي منغّص عليه يا قلبي!
أبو الرواق (لنور): فضفض، قلي خير؟ قلبك مقبوض؟ حاسس إنك بحاجة أنه تراجع أفكارك وأمورك؟
حكيم: مو وقته هلأ، عنّا دراسة!
أبو الرواق (لحكيم): حكيم! تركه يعبّر عن مكنوناته، هاد حسّاس، خطي.
حكيم (لنور): نور حبيبي، عنّا دراسة، معلش بالاستراحة منناقش أمورك؟
نور (يتنهد): طيب منشوف.
(أبو الرواق يبدي انزعاجه، بأن خططه لم تعمل بشكل جيد)
حكيم (لحريص): وإنت أمورك تمام أستاذ حريص؟
حريص: عال العال، مية على مية، مليون على مليون.
أبو الرواق: أنه مليون، الميزانية ضعيفة وبدها تزبيط.
حريص: اي والله لا تذكرني!
حكيم: رح نلاقي حل بعد الفحص، ممكن هلأ نبلش؟
أبو الرواق: طيب، أنا بورجيكم.
(بعد مرور ساعة)
أبو الرواق: وهي مرقتلهم ساعة، حاجتهم!
أبو الرواق (لنور): الغرفة كتير مكركبة، لازمها نفضة! الغبرة فيها بتكتم عالنفس وبتغم عالقلب، شلون عم تتحمّلها؟
نور: هلأ ما فيني أقاطع أبدا، رح ناكل بهدلة.
حكيم (يدق على الطاولة): ما بدنا مقاطعات! أبو الرواق اقعود على نصلك، بدنا نركّز.
أبو الرواق: وإذا قلت ما بدي.
(يمسك أبو الرواق مساحة السبورة، ويخربط جدول الأسبوع)
أبو الرواق: اليوم منعمل تخفيف للجدول، خلص ما عاد فيني.
حكيم: له له له، شو عم تعمل؟
أبو الرواق: عنجد ما عاد فيني، خلص منقسّم الدراسة البقيانة على بقية الأسبوع.
حكيم: ما منلحق!
أبو الرواق: منلحق منلحق.
أبو الرواق (لسليم): ما جاي عبالك صندويشة دونر معتبرة؟
سليم: دونر؟ لا كتير تقيلة.
أبو الرواق: اي ما رح يصير شي.
حريص: بعدها هلأ وقتها المصاريف؟
أبو الرواق: حاتم الطائي، معلش تتنازل شوي عن بخلك، نحن مرهقين وبحاجة للتنفيس!
حكيم: لا أنتو هيك شوشتوني عالأخير، استراحة!
مشهد يوم الأربعاء
(يدخل حريص ونور، وحكيم)
حكيم: عجبكم شو صار امبارح؟
(ويمسك حكيم بالقلم، ويقول: امبارح بس يا دوب نص المخطط عملته لمى)
نور: والله هاد أبو الرواق خربلنا كل الطبخة.
حكيم: اليوم بدنا نحاول نسيطر عليه، مو كل ما قال شغلة منرد! مفهوم.
نور: لازم نحاول نسيطر، صح. لأنّه لما لمى بتبلش كل يوم تأجّل، بتكون عم تكوّن عادة سيئة جدا، رح تأثّر على طريقة تعاملها مع الالتزام والانضباط.
حكيم: خلص اليوم رح نضبطها.
(يدخل سليم وهو متعب)
سليم (بتعب وهو ينادي): يا جماعة وينكم؟
الجميع: خير شبك؟
سليم: الوضع ما منيح أبدا.
الجميع: شو في؟
سليم: صندويشة الدونر مخربطة الدنيا خربطة.
حكيم: قلتلكم بلا أكل السوق هلأ، عم تعمل أم لمى أطيب أكلات، كلّها صحية وخفيفة، شو لزمة الدونر كان؟
سليم: بدنا استراحة على الأقل هالساعتين.
حكيم: يا ربي، الصبح أفضل وقت للإنجاز والدراسة، مو معقولين إنتو!
أبو الرواق (يدخل، ويلاحظ أنه الأمور خربانة أصلا): صباح الخير. له له له له، شو صاير؟
الجميع (ينظر إليه باستياء): عجبك؟
أبو الرواق: أنا شو دخلني!
(يضع قهوته ويراقب المشهد)
حكيم: كله منك، طيب، رح نعمل استراحة لمدة ساعة خلالها، لازم لمى تشرب زهورات وتسترخي قدر الإمكان.
أبو الرواق (لنور): نوّار، شو رأيك بهي الاستراحة، تعمل لمىcall مع بنات خالها، صلة رحم، من زمان ما حكيناهم.
نور: لا بلا هلأ بعدين.
أبو الرواق (لنور): منشحن طاقتنا، سماع منّي.
نور: هيك رأيك؟
أبو الرواق: اي صدقني.
(يقف أبو الرواق ويكتب على السبورة): محادثة مع بنات خالي، وإكمال الورد.
أبو الرواق (لسليم): سليمو، وبس تشدّ لمى أكتر، خلي تمشي ساعة، شفت شلون بدعمك أنا، علوا يبين فيك.
حكيم: لا مو معقول، هيك ما بضل عندها طاقة للدراسة! بدها تحكي وتكر، وتمشي ساعة..
أبو الرواق: صدقني هيك منشحن الطاقة، بعدها تاعى حكيمو، بدي أقلك شغلة، في كتاب في غرفة القعدة، أول مفرق بعد الطاولة على إيدك اليمين، بعنوان: “حدث في مثل هذا اليوم”، أنا شايف أنه كتير كتير مثير للاهتمام، تصفّح منه شوي.
حكيم: لك حتى أنا ما نفدت منك! عم تلعب بعقلي؟
أبو الرواق: سماع مني، وشفلي شو صار أحداث مهمّة بتاريخ اليوم، دخيلو الفضولي يلي بحب العلم والثقافة العامّة.
حكيم: ولي، بده يجنني هاد.
مشهد يوم الخميس
(يدخل أبو الرواق)
أبو الرواق (وهو يصف الكراسي): رايق، رايق، رايق، وراصص الكراسي، لحبايبي بس وناسي…
(ثمّ يوجه كلامه للجمهور): هلأ هنن ما كتير حبايبي وناسي بس ماشي الحال…
حكيم: أبو الرواق إنت هون؟
أبو الرواق: هلا وغلا بحكيم الجبل.
حكيم: تاعى، تاعى، بتعرف بكرة شو في؟
أبو الرواق: بكرة السفر اه اه، بكرة
حكيم: وإنت الصادق بكرة الفحص! شوف ها، امبارح يلي بدك ياه صار، اليوم حسّك ما بدي أسمعه.
أبو الرواق: أنا شو عملت؟
حكيم: لا تناقش أبداً.
أبو الرواق: اي اي خلص، ساووا يلي بدكم ياه، وهي رح أقعد وأسكت (يجلس على كرسيه، ويكمل شرب القهوة)
(يدخل سليم، وحريص، ونور وهو حزين)
حكيم (لنور): وأنت شبك؟
نور: حاسس كلّ الأمور مخربطة.
حكيم: هي هي علينا، منسكج واحد، بيتخربط التاني، مو امبارح عملتوا كلكم يلي بدكم ياه؟ ليش كمان زعلان؟
نور: هون المشكلة، أنه عملنا كل يلي بدنا ياه، بس مو بوقته.
حكيم: وليش هلأ لحكيت؟
نور: شو عرفني، هاد أبو الرواق ضل يزن، ولعب بعقلنا كلنا!
(ينظر الجميع باتجاه أبو الرواق)
حكيم: طيب، رح نحاول ننقذ ما يمكن إنقاذه.
حكيم (لسليم): سليم، بدنا طاقة قصوى، مفهوم؟
سليم: حاضر.
حكيم (لنور): نور، بدنا طاقة قصوى، مفهوم؟
نور: مالي قدران، بكرة الفحص، وحاسس أنه فقدنا السيطرة.
حكيم: وحلّتها؟ دعاء؟ ركعتين؟ قرآن؟ مشيلنا ياها.
نور: لازم نعمل حالة “توكل” متكاملة، وليس “تواكل”.
أبو الرواق: ما في فايدة من أي شي، صدقوني.
حكيم: انت اقعود عاقل، وما تحكي ولا كلمة.
أبو الرواق: هيك صار؟ ماشي، بتحب أحكيلهم شو حدث في مثل هذا اليوم؟ قلنالك تصفحه تصفح، ساعتين طامس بالكتاب.
حكيم (يتجاهله ويقول للجميع): بدنا نحاول، ما بصير نستسلم، نور شدّلي حالك، الله يرضى عليك.
نور: مالي عرفان، حاسس في شعور غريب.
أبو الرواق (لنور): أنا فهمان عليك يا صديقي، علوا أعرف شو لزمة الدراسة، إذا الذكاء الاصطناعي عم ياخد كل الشغل؟!
حكيم: أبو الرواق مو وقتك أبدا، خلصونا صار نص النهار ولسه ما انفتح الكتاب، عنّا تراكم كتير.
نور: طيب، خلي لمى، تتوضأ، تعمل أذكارها، منستعين بالله ومنبلش.
حريص: اي والله.
أبو الرواق (لحريص): انت شو دخلك؟
حريص: طبعا، دخلني، من مصلحتي أنه لمى تدرس وتنجح وتاخد هدايا محرزة، وبعدها تدرس وتشتغل، وتكسب فلوس.
حكيم: برافو عليك حريص، يلا كل واحد يشغّل كل الحوافز اللي عنده، يلا نور عطينا وحدة من عندك.
نور (بحماس): من مصحلة لمى أنها تدرس وتعمل يلي عليها، وتحتسب هالتعب أجر عند الله.
حكيم (وهو يصفق): الله حيّو، أبو الرواق روقنا دخيل عينك، عطينا سحبة من سحباتك.
أبو الرواق: تكرم عينك وهي وحدة، بالجد والعمل، نحقق الأمل… بالجد والعمل، نحقق الأمل…
(ويخرجون من المشهد)
مشهد يوم الجمعة
(تدخل الشخصيات معاً)
حريص: صباح الحرية!
سليم: صباح الراحة!
نور: صباح الحمد والشكر!
(يدخل حكيم وهو يحمل أوراقاً)
حكيم: صباح الخير يا جماعة، أخيراً خلص امتحان الرياضيات.
أبو الرواق (يدخل وهو يجرّ كرسيه): صباح الخير… يا لطيف شو تعبت هالأسبوع.
حكيم: أنت سبب نص التعب أصلاً.
أبو الرواق: وأنت كملت النص التاني.
نور: الحمد لله، المهم مرّ الامتحان على خير.
حكيم (يقف أمام السبورة): طيب، خلونا نراجع شو صار: الاثنين: كانت الوضع جيد، الثلاثاء: بدأ التعب والملل والتأجيل، الأربعاء: تخبيص من كل النواحي، الخميس: إنقاذ ما يمكن إنقاذه.
أبو الرواق: والجمعة… نجونا بأعجوبة.
حكيم: هاد الشي لازم ما يتكرر! كل واحد يشوف شو ممكن يحسّن للمرة القادمة، أرجوكم.
سليم: عم فكّر أنه لازم أكون حازم أكتر، مو كل ما صار تعب خفيف، أتهرّب، وأكنسل كل البرنامج.
نور: وأنا لازم دومًا أرتب الأولويات، الدراسة عبادة، والالتزام والانضباط عادات محمودة، الرسول عليه الصلاة والسلام قال: “احْرِصْ عَلَى مَا يَنْفَعُكَ، وَاسْتَعِنْ بِاللَّهِ، وَلَا تَعْجِزْ”، وعلّمنا نكرر هاد الدعاء: “اللَّهُمَّ إِنِّي أَعُوذُ بِكَ مِنَ الْهَمِّ وَالْحَزَنِ، وَمِنَ الْعَجْزِ وَالْكَسَلِ، وَمِنَ الْجُبْنِ وَالْبُخْلِ، وَمِنْ غَلَبَةِ الدَّيْنِ وَقَهْرِ الرِّجَالِ”.
حريص: وأنا رح أحاول دائما أحفزّكم بشكل إيجابي ومثمر.
أبو الرواق: وأنا ما حدا رح يسألني شي؟
الجميع: تفضّل أبو الرواق، قول يلي عندك!
أبو الرواق: عنجد ما بعرف! حساس أنه وجودي هو المشكلة؟
حكيم: المشكلة مو بوجودك يا أبو الرواق، المشكلة لما تسيطر. نحن منحترمك، ومنحترم تقلّباتك، بس ما بصير تخّرب كل شي بمجرد أنه أنت مالك رايق. الانجاز، بده وقت، وصبر، وطولة بال، الشخص الناجح لازم يكون عنده التزام بغض النظر عن مزاجه، “جاي على بالي” و”مو جاي على بالي”، لو القصة قصة “جاي عبالي” ما كان حدا درس، ولا أنجز. لمّا بتكون تعبان، منلاقيلك طريقة تتحمس من خلالها، بس بالأخير، القرار إلنا نحن!
أبو الرواق: بس كمان ما لازم تلغوني.
نور: ما رح حدا يلغيك، إنت الكل بالكل، بس متل ما قال حكيم، النجاح أنه نعمل الشي يلي علينا، سواء حبينا أو لأ.
حكيم: والنجاح مو شغلة لحظية.
سليم: النجاح عادة واستمرارية.
حريص: واستثمار طويل الأمد.
أبو الرواق: وغنية فرفوشة.
الجميع: أبو الرواق! على أساس بدك تنصلح؟
أبو الرواق: بنصلح بنصلح، بس هلأ حاج حكم وعبر، فرفشولنا هالجمهور الحلو.
(يتوجه للجمهور) ما بدكم شوية أكشن؟
(ويغني): وحياة قلبي وأفراحه…
(ويغني الجميع معه)
تمّت
بقلم: سحر خواتمي
شكر خاصّ: لفتيات ومعلمات مجموعة “قدوة”.
الملفات
ملف المسرحية PDF